Дыдактычная гульня “ Добра і дрэнна, можна і нельга”
(для дзяцей рознаўзроставай групы)
Мэта:
Замацоўваць уменні арыентавацца ў складаных жыццёвых сітуацыях: звяртацца пры неабходнасці за дапамогай да знаёмых, супрацоўніка міліцыі, патэлефанаваць у пажарную ахову, выклікаць “хуткую дапамогу”.
Садзейнічаць развіццю дробнай маторыкі рук.
Выхоўваць свядомыя і станоўчыя адносіны да асабістай бяспекі.
Дыдактычны матэрыял: гульнявое поле (у форме круга), набор сюжэтных і прадметных картак, картак з нумарамі служб дапамогі, фішкі чырвонага, жоўтага і зяленага колераў, кубік з чырвонымі, жоўтымі і зяленымі гранямі, прышчэпкі.
Правілы гульні: У гульні удзельнічаюць 2-4 дзіцяці. Адзін з іх,
на гульнявым полі, пры дапамозе прышчэпак замацоўвае сюжэтныя (прадметныя) карткі. Кожнаму ўдзельніку раздаюцца фішкі чырвонага, жоўтага і зяленага колераў пароўну ( чырвоная фішка - азначае забароненае дзеянне, небяспечнае для здароўя і жыцця; жоўтая фішка – асцярожна! Гэтае дзеянне магчыма пад наглядам дарослага; зяленая фішка – дзеянне можна і патрэбна выконваць).
Гульнявыя дзеянні: пошук картак, выкладванне фішак на гульнявое поле, спаборніцтва.
Ход гульні:
Па чарзе дзеці кідаюць кубік. Згодна колеру, які выпаў на грані кубіка, дзіця бярэ фішку і кладзе яе на сюжэтную (прадметную) картку, якая адпавядае колеру фішкі і дае тлумачэнне, чаму фішка пастаўлена менавіта сюды.
Напрыклад: на кубіку выпадае чырвоны колер. Дзіця ставіць чырвоную фішку на картку з дзеяннем, якое прадстаўляе пагрозу жыццю і здароўю (нельга браць у рукі запалкі). Перадае права ходу наступнаму ўдзельніку.
Гульня працягваецца да тых пор, пакуль не будуць запоўнены фішкамі ўсе карткі на гульнявым полі.